xoves, 4 de maio de 2017

ALIMÉNTATE BEN!

Hoxe puxémoslles as pilas aos nosos bocatas! 
Ensináronnos a escoller os ingredientes máis sans e nutritivos.
É fundamental potenciar nos nenos e nenas bos costumes alimentarios: comer variado, seleccionar os alimentos, coñecer as súas orixes, non abusar ou evitar os que non nos achegan ningún nutriente, etc. Isto será a base para un futuro saudable. 




domingo, 23 de abril de 2017

A VOLTA AO MUNDO EN 80 DÍAS

Neste vídeo están recollidas imaxes dalgunhas das actividades realizadas durante o proxecto da Volta ao Mundo. Aínda que faltan moitas, é unha boa mostra do que fixemos. Premede na imaxe para velo. 



mércores, 8 de marzo de 2017

DÍA DA MULLER.

Altas, baixas, loiras, morenas, gordas, fracas, viaxeiras, caseiras, nais, avoas, faladoras, caladas, montañeiras, cociñeiras, atletas, poetas, pensadoras, costureiras, filósofas, revolucionarias, soñadoras... 

VIVAS E LIBRES.





 




















POR UN FUTURO EN IGUALDADE! 
Eduquemos para conseguilo. 

Lecturas recomendadas para os nenos e nenas: 
"Artur e Clementina". Adela Turín. Kalandraka. 
"Rosa Caramelo". Adela Turín. Kalandraka.
Unha feliz catástrofe. Adela Turín. Kalandraka. 

Lecturas recomendadas para familias e profesorado
"Máis aló do azul e do rosa".  Ana Torres Jack. Editorial Galaxia. 


sábado, 4 de marzo de 2017

ENTROIDO 2017: O COLEXIO VAI A PIQUE. NOVO COLEXIO XA!

Neste Entroido metemos medo cos nosos disfraces de monstros do fondo do mar. A ver se co susto, empezan a construír o novo cole xa. O noso vai velliño de todo! 
Pasámolo en grande. Se queredes ver fotos do desfile ata o Revel, visitade o blog do centro: www.ceipcruceiro.wordpress.com
Quentando motores os días previos ao desfile. 


EXCURSIÓN AO TEATRO

O 22 de febreiro fomos ao Auditorio de Afundación a ver a obra "Osiño", da compañía de teatro Trompicallo. 
Desfrutamos moito do espectáculo e , como houbo sorte e tivemos bo día, merendamos ao sol na Alameda de Pontevedra.









sábado, 18 de febreiro de 2017

A VOLTA AO MUNDO EN 80 DÍAS: PARÍS.

A nosa viaxe polo mundo enteiro, seguindo o percorrido de Phileas Fogg, está a ser do máis interesante. 
Estamos a descubrir un feixe de curiosidades que nos abraian. 
A nosa primeira parada foi París.









Preme na imaxe para ver o vídeo.



luns, 30 de xaneiro de 2017

AS ÁRBORES DA PAZ



No ano 2004, Wangari Maathai convertiuse na primeira muller africana en recibir o Premio Nobel da Paz. 

Esta activista política nacida en Kenia, contribuíu ao desenvolvemento sostible, a democracia e a paz e impulsou o, mundialmente coñecido, Movemento Cinturón Verde. Esta iniciativa ocupouse da protección do medio ambiente dando relevancia á muller africana e fixo fronte á aberrante deforestación que estaba tendo lugar no 1977. 

Na última semana coñecemos a historia de Wangari e abraiámonos descubrindo como ela, e moitas máis valentes mulleres, repoboaron os seus bosques plantando árbores e máis árbores. 

Quixemos facerlle a nosa particular homenaxe no Día Escolar da Non Violencia e a Paz. 






Fixemos a nosa árbore da paz.




Álvaro leu a nosa parte do manifesto: "A paz tamén é plantar unha maceira". 
                                                                              



Plantamos sementes de esperanza.

POR UN MUNDO CHEO DE PAZ E NATUREZA VIVA